غزني پوهنتون کې د ځینو فرهنګي کړنو د ترسراوي په موخه د فرهنګي کمېټې ناسته ترسره شوه.

غزني پوهنتون کې د محصلانو چارو معاونیت اړوند فرهنګي کمېټې ناسته ترسره شوه. یاده ناسته چې د دغي کمېټې د استازو په ګډون جوړه شوې وه، پکې د راتلونکو فرهنګي پروګرامونو پر تنظیم او عملي کولو هر اړخیز بحث او لازمې پریکړې وشوې.
د ناستې په پیل کې د محصلانو چارو مرستیال او د فرهنګي کمېټې مسؤل مفتي عزت الله نوري د تېرو فعالیتونو ارزونه وړاندې کړه او ټینګار یې وکړ چې فرهنګي چارې د محصلینو د فکري ودې، ملي هویت د پیاوړتیا او ټولنیز شعور د لوړولو لپاره ځانګړی ارزښت لري.
وروسته له اجنډا سره سم د پوهنتون په داخل کې د ټولو بیرغونو په نوي کولو او د مخکینو او زاړه شویو بیرغونو په ساتنه؛ او د عالیقدر امیرالمؤمنین حفظه الله تعالی ورعاه د فرمانونو د ښه تطبیق په موخه د پوهنتون په معلومو ځایونو کې د لیکلو او د یادې کمېټې د دایمې غړو په انتخاب او متفرقه موضوعاتو بحث او لازمې پریکړې ترسره شوې.
د نشراتو او عامه اړیکو عمومي مدیریت
نېټه: شنبه
۱۴۴۷هـ.ق، شوال المکرم ۱۷ مه
۱۴۰۵هـ.ش، حمل ۱۵ مه
۲۰۲۶م، اپریل ۴ مه