غزني پوهنتون کې د امربالمعروف او نهی عن المنکر قانون د تطبیق کمېټې ناسته ترسره او په یو لړ مهمو موضوعاتو د بحث ترڅنګ لازمي پريکړې ترسره شوې.
غزني پوهنتون کې د امربالمعروف او نهی عن المنکر قانون د تطبیق کمېټې غونډه، د عمومي رئیس شیخ مولوي عبدالمالک محسن، په مشرۍ؛ او د دغي کمېټې د ټولو غړو په شتون کې ترسره شوه.
د ناستې پیل د قرآن پاک د مبارکو آیتونو په تلاوت سره وشو.
ورپسې شیخ صاحب ګډونوالو ته د ښه راغلاست ترڅنګ، د اسلامي ارزښتونو د ساتنې او د شریعت د اصولو د تطبیق اهمیت روښانه کړ. نوموړي وویل چې پوهنتون د ټولنې د راتلونکي نسل د جوړولو مهم مرکز دی، او د امربالمعروف او نهی عن المنکر د قانون تطبیق د محصلینو په سالمه روزنه کې اساسي رول لري.
وروسته له نوي اجنډا سره سم، د استادانو، کارکوونکو او محصلینو د صورت او سيرت په اصلاح، د محصلینو پنځه وخته په جماعت سره د لمانځه، او د امیرالمؤمنین حفظه الله تعالی د فرمانونو ښه تطبیق ترڅنګ په یو لړ متفرقه موضوعاتو هم بحث او لازمي پریکړې تر سره شوې.
د نشراتو او عامه اړیکو عمومي مدیریت
سه شنبه ، ۱۱ جمادی الثاني ۱۴۴۷ هـ.ق— ۱۱ قوس۱۴۰۴ هـ.ش
