د غزني پوهنتون او د هېواد د معیار او کیفیت ملي ادارې ترمنځ د علمي څېړنو د پیاوړتیا او معیارونو د لوړولو په موخه د دوه اړخیزو علمي همکاریو هوکړه لیک لاسلیک شو.
نن ورځ د غزني پوهنتون او د هېواد د معیار او کیفیت ملي ادارې ترمنځ د علمي څېړنو د پیاوړتیا او معیارونو د لوړولو په موخه، د دوه اړخیزو علمي همکاریو هوکړه لیک لاسلیک شو.
یاد هوکړه لیک په یوه رسمي غونډه کې چې د معیار او کیفیت ملي ادارې په عمومي تالار کې جوړه شوې وه، د دواړو ادارو د مشرتابه پلاؤ په حضور کې لاسلیک شو. په دغو مراسمو کې د پوهنتون عمومي رئیس او مل پلاوې او د یادې ادارې مسؤلینو او استازو پراخ ګډون کړی و.
د هوکړه لیک موخه د دواړو لورو ترمنځ د څېړنیزو پروژو طرحه او تطبیق، د علمي ورکشاپونو او سیمینارونو جوړول، د معلوماتو تبادله، او د کیفیت د ارزونې سیستمونو پیاوړتیا باندې کار کول یاد شوي.
د هوګړه لیک د لاسلیک پر مهال د هېواد د معیار او کیفیت ملي ادارې تخنیکي معین د غزني پوهنتون د هر اړخیز پرمختګ او د استادانو او محصلینو د څېړنیزو کړنو د پراختیا لپاره د هر ډول همکاریو ډاډ څرګند کړ؛ او زیاته يې کړه چې د لوړو زده کړو بنسټونو سره، همکاري کولی شي د علمي څېړنو کیفیت لوړ کړي او د هېواد په کچه د معیاري، سیستمونو د پلي کېدو زمینه برابره کړي.
بلخوا د غزني پوهنتون عمومي رئیس شیخ مولوي عبدالمالک محسن د دغه هوکړلیک د ارزښت په اړه وویل، چې دا تړون به د څېړنیزو فعالیتونو د پراختیا، د علمي پروژو د پلي کولو او د استادانو او محصلینو د ظرفیت لوړولو لپاره به نوې لارې پرانیزي. او زیاته یې کړه چې د غزني پوهنتون علمي کادرونه به له یادې ادارې سره هر ډول همکارۍ ترسره او یادې همکارۍ به د نظام د اداراتو د قوت او پرمختګ سبب وګرځي.
د یادونې وړ ده چې په وروستیو کې د غزني پوهنتون او هېواد د علمي بنسټونو او اداراتو ترمنځ د همکارۍ کچه پراخه شوې، چې دا بهیر د علمي پرمختګ لپاره یو مهم ګام بلل کېږي.
د نشراتو او عامه اړیکو عمومي مدیریت
نېټه: يکشنبه
۱۴۴۷هـ.ق، شوال المکرم ٢٥ مه
۱۴۰۵هـ.ش، حمل ٢٣ مه
۲۰۲۶م، اپریل١٢مه
