غزني پوهنتون کې د شپږګونو پوهنځیو محصلینو ترمنځ د روغتیا، ورزشي روحیې، یووالي او همغږۍ د پیاوړتیا په موخه د فوټبال څلور ورځنۍ سیالۍ پیل شوې.
قمري نېټه: محرم الحرام ۵، ۱۴۴۷ هـ.ق
لمريز نېټه: سرطان ۱۰، ۱۴۰۴ هـ.ش
مېلادي نېټه: جولای ۱، ۲۰۲۵م
تېره ورځ په غزني پوهنتون کې د محصلانو چارو معاونیت له لوري د شپږګونو پوهنځیو د محصلینو ترمنځ د فوټبال څلور ورځنۍ سیالۍ په رسمي ډول پیل شوې. په دغو سیالیو کې د بېلابېلو پوهنځیو اتو ټیمونو ګډون کړی، چې هدف یې د محصلینو ترمنځ د روغتیا، ورزشي روحیې، یووالي او همغږۍ پیاوړتیا ده.
د سیالیو د پرانیستې په مراسمو کې د محصلانو چارو سرپرست مرستیال پوهنمل عبدالمتین میاڼي د ورزش اهمیت ته اشاره وکړه او ویې ویل: چې ورزش نه یوازې فزیکي روغتیا تضمینوي، بلکې د زغم، همکارۍ او مشرتابه مهارتونه هم پیاوړي کوي. دا ډول سیالۍ د محصلینو ترمنځ مثبت رقابت رامنځته کوي او د پوهنتون فضاء لا ښکلې کوي؛ او زیاته یې کړه چې د پوهنتون رهبري هڅه کوي چې د نورو لوبو لکه والیبال او کرکټ لپاره هم سیالۍ تنظیم کړي، ترڅو د محصلینو ورزشي استعدادونه نور هم وغوړېږي.
د سیالیو لومړۍ لوبه د ژبو، ادبیاتو او ښوونې او روزنې پوهنځیو ترمنځ ترسره شوه.
په ورته وخت کې، محصلین له دې نوښت څخه هرکلی کوي او وایي چې دا ډول فعالیتونه نه یوازې د دوی د ذهني فشارونو کمولو کې مرسته کوي، بلکې د ملګرتیا او همکارۍ فضا هم رامنځته کوي.
د نشراتو او عامه اړیکو عمومي مدیریت
