غزني پوهنتون کې د داخلي ساحې، سړکونو او لارو د هوارکارۍ او اساسي رغونې رسماً چارې پیل شوې.
قمري نېټه: صفرالمظفر، ۲۴، ۱۴۴۷ هـ.ق
لمريز نېټه: اسد، ۲۷ ، ۱۴۰۴ هـ.ش
مېلادي نېټه: اګست، ۱۸ ، ۲۰۲۵م
د غزني پوهنتون د ودې او معیاري کیدو په لړ کې، د یاد پوهنتون د محوطې دننه د سړکونو او لارو د هوارکارۍ چارې نن په رسمي ډول پیل شوې.
یادې پروژې د پوهنتون د رهبرۍ، غزني ولایت مقام، استخباراتو لوی ریاست او محمدي پلي لوا په همغږۍ پلې کېږي چې د والي صاحب الحاج مولوي عبدالصمد جاوید له لوري ۳۵۰۰ لیتره تیل او د استخباراتو لوی ریاست رئیس مولوي صاحب عبدالحق وثیق له لوري د ۱۰۰۰۰ لیتره تیلو او د محمدي پلي لوا د قومندان مولوي محمد ګل خیبر له لوري د ماشنیري همکاري شوې وه چاري یې نن رسماً پیل شوې د دغو کارونو د ترسراوي موخه د محصلینو، استادانو او کارکوونکو لپاره د تګ راتګ آسانتیا، د چاپېریال ښېرازې او د تعلیمي بهیر لا ښې اسانتیاوې برابرول دي.
د دغو چارو د پیل پرمهال د غزني پوهنتون رهبرۍ د یادو مسؤلینو له هر ډول همکاریو مننه وکړه. او زیاته یې کړه چې د اسلامي نظام ټول مسؤلین او چارواکي خپلو چارو ته متوجه او دادی نن ورځ یې په خپل ځانګړي شفقت د تحصیلي بنسټ د پرمختګ لپاره او د هیواد بچیانو د روزنیز مرکز لپاره خپلي چارې روانې کړي دي. او ویې ویل چې د سړکونو او لارو هوارول نه یوازې د محصلینو د ورځني تګ راتګ ستونزې حلوي، بلکې د پوهنتون د ښکلا، چاپېریال ساتنې او د معیاري خدماتو په برابرولو کې هم مهم رول لري.
مسؤلینو ډاډ ورکړ چې د پروژې چارې به د ټاکلي وخت په ترڅ کې په لوړ کیفیت سرته ورسېږي.
غزني پوهنتون، چې د زرګونو محصلینو د علمي روزنې کور دی، په وروستیو کلونو کې د اسانتیاوو د زیاتوالي او پرمختیايي پروژو شاهد دی. د داخلي سړکونو او لارو هوارول به د دې پراختیایي هڅو یوه مهمه کړۍ وي.
د نشراتو او عامه اړیکو عمومي مدیریت
