غزني پوهنتون بیلابیلو پوهنځيو ته په دوهم جذب کې بریالي شویو یو شمېر محصلینو ته د پوهنتون له چاپېریال سره د بلدتیا په موخه معلوماتي سمینار ترسره شو.
قمري نېټه: ربیع الثاني ،٢، ۱۴۴۷ هـ.ق
لمريزه نېټه: مېزان، ٣ ، ۱۴۰۴ هـ.ش
مېلادي نېټه: سپتامبر، ٢٥ ، ۲۰۲۵م
غزني پوهنتون کې د محصلانو چارو معاونیت له لوري، د علمي او اداري مسوولینو په ګډون، بیلابیلو پوهنځیو ته په دوهم جذب کې بریالي شویو لسګونو محصلینو د هرکلي او د پوهنتون له چاپېریال سره د بلدتیا په موخه ځانګړی علمي سمینار ترسره شو.
د سمینار د پیل وینا پرمهال د محصلانو چارو مرستیال مفتي عزت الله نوري د نویو محصلینو هرکلی وکړ او هغوی ته یې د پوهنتون د علمي ارزښتونو، د لوړو زدهکړو د تګلارې او د زدهکړې پر مهال د نظم او دسپلین د ساتلو په اړه مهمې لارښوونې وړاندې کړې. او له محصلینو څخه یې غوښتنه وکړه چې د نظام د بقاء لپاره شپه او ورځ پر ځان یوه کړي او ځانونه په دیني او عصري زده کړو سمبال کړي، تر څو مو هیواد په هره برخه کې د نورو له هر ډول احتیاجه خلاص شي.
وروسته څو تنو استادانو دغو محصلینو ته د غزني پوهنتون پېژندنې، امکاناتو، د زدهکړو بهیر، کتابتون او لابراتوارونو د استفادې، د محصلانو د خدماتو او د اکادمیکو اسانتیاوو، کريديټ سیستم، معلوماتي ټیکنالوژۍ د ازموینو لایحې اړوند مفصل معلومات وړاندې کړل.
د غونډې ګډونوالو د پوهنتون له دې نوښت څخه خوښي وښوده او ټینګار یې وکړ چې داسې پروګرامونه کولی شي د نوي محصل لپاره د زدهکړې په بهیر کې د لا بریا زمینه برابره کړي.
د نشراتو او عامه اړیکو عمومي مدیریت
