غزني پوهنتون شرعیاتو پوهنځي ته د شمولیت په موخه د سلطان محمود غزنوي خصوصي پوهنتون د شرعیاتو پوهنځي له شاو خوا ۵۰ تنه محصلینو څخه عمومي ازموینه واخیستل شوه.

قمري نېټه: ربیع الاول ،۱۱، ۱۴۴۷ هـ.ق
لمريز نېټه: سنبله، ۱۳ ، ۱۴۰۴ هـ.ش
مېلادي نېټه: سپتامبر، ۴ ، ۲۰۲۵م

څه موده وړاندې د لوړو زده کړو وزارت له لوري په هیواد کې د څو خصوصي پوهنتونو د دغه وزارت د قوانینو او لوړو زده کړو د اصولو نه مراعاتولو په موخه د فعالیت جوازونو د لغوه کولو ترڅنګ د سلطان محمود غزنوي خصوصي پوهنتون د فعالیت جواز هم لغوه او محصلین یې د یوې پریکړي له مخي دولتي او نورو خصوصي پوهنتونو ته معرفي شول چې له هغو څخه یې د دغه پوهنتون د شرعیاتو پوهنځي د ټولو صنفونو محصلین د یو طرزالعمل له مخي د غزني پوهنتون، شرعیاتو پوهنځي ته معرفي چې نن ورځ  د غزني پوهنتون د رهبرۍ او ځانګړي هیئت په شتون کې ورڅخه عمومي ازموینه واخیستل شوه.
د ازموینې د پیل پر مهال د یاد پوهنتون د علمي چارو مرستیال مولوي محمد حیدر حمزه ګډونوالو ته د ازموینې د پروسې اړوند د پوره شفافیت ډاډ ورکړ او زیاته یې کړه چې دغه پروسه به په عادلانه ډول ترسره شي او بریالي محصلین به د غزني پوهنتون د شرعیاتو پوهنځي د دوامدارو پروګرامونو برخه شي. او د ازموینې له برخوالو یې غوښتنه وکړه چې باید د دغي پروسې اصول او مقررات په نظر کې ونیسي او له هر ډول نقل کولو څخه ډډه وکړي. وروسته ازموینه د شفافیت او معیارونو د خوندیتوب په موخه د شرعیاتو پوهنځي ترڅنګ د بیلابیلو پوهنځیو استادانو او هیئت په شتون کې ترسره شوه .
د ازموینې ګډونوال محصلینو هم د یادې پروسې ستاینه وکړه او هیله یې څرګنده کړه چې د خپلو هڅو او وړتیاوو پر بنسټ به د غزني پوهنتون د شرعیاتو پوهنځي د محصلینو په ډله کې ځای ومومي.

د نشراتو او عامه اړیکو عمومي مدیریت