غزني پوهنتون کې د اداري او خدماتي کارکونکو څخه د اصلاحي او عقیدوي درسونو د نصاب اړوند ازموینه واخیستل شوه.
۱۴۴۶هـ ق د رجب المرجب ۲۶مه
۱۴۰۳هـ ش د سلواغې ۸ مه
۲۰۲۵م د جنورۍ ۲۷مه
د غزني پوهنتون د دعوت او ارشاد آمریت له لوري، د یاد آمریت د موخو او فعالیتونو د پرمختګ په لړ کې د اداري او خدماتي کارکوونکو څخه د اصلاحي او عقیدوي درسونو د نصاب اړوند ازموینه واخیستل شوه. دغه ازموینه، چې د پوهنتون په تحصیلي چاپېریال کې د اداري او خدماتي کارکوونکو د علمي پوهې لوړولو او د نصاب اړوند د هغوی د پوهې کچې ارزولو لپاره جوړه شوې وه، د پوهنتون په مسجد کې ترسره شوه.
په ازموینه کې د پوهنتون ټولو اداري او خدماتي کارکوونکو ګډون کړی و، چې د هغوی هڅې او تیاری د یاد آمریت د موخو د ترلاسه کولو لپاره یوه مهمه برخه وبلل شوه.
د آزموینې د پیل پرمهال د دعوت او ارشاد آمریت مسئولینو په خپلو څرګندونو کې وویل چې دا ډول ازموینې د پوهنتون په تحصیلي پرمختګ کې مهمه ونډه لري، ځکه چې د ادارې کارکوونکي د نصاب اړوند مسایلو سره ښه اشنا کېږي او د خپلو مسئولیتونو په عملي کولو کې لا اغېزمن تمامېږي.
او زیاته یې کړه چې د ازموینې پایلې به د دغه آمریت له لوري تر کتنې وروسته ترتیب او پر خپل وخت اعلان او پر بنسټ به یې د اړوندو برخو د ښهوالي لپاره لازم ګامونه اوچت شي.
دا نوښت د غزني پوهنتون د تحصیلي چاپېریال د لا پرمختګ لپاره یو مهم ګام ګڼل کېږي، او د دعوت او ارشاد آمریت په راتلونکي کې د نورو ورته فعالیتونو د ترسره کولو ژمنه وکړه.
د نشراتو او عامه اړیکو عمومي مدیریت
