غزني پوهنتون کې څلور تنو استادانو د خپلو علمي ترفېعاتو په موخه علمي-څېړنیز کنفرانسونه وړاندې کړل.
ورځ: شنبه
٢٣/شعبان المعظم۱۴۴۶ه ق
۴/ کب / ۱۴۰۳ هـ ش
۲۲/ فبروري / ۲۰۲۵ ميلادي
د غزني پوهنتون د شرعیاتو پوهنځي استادانو پوهنمل عین الله کریمي، پوهنمل رحمت الله حیدري، پوهنمل سید صبغت الله ابراهیمي، او پوهنمل احسان الله شهامت له پوهنملي رتبو څخه د پوهندوی رتبې ته د ترفیع په موخه په ځانګړو مسلکي موضوعاتو علمي-څېړنیز کنفرانسونه وړاندې کړل.
د یادو کنفرانسونو پیل د قرآن کریم د مبارکو آیتونو په تلاوت سره وشو. چې پکې د شرعیاتو پوهنځي رئیس، استادان، د پوهنتون مشرتابه، د شپږو پوهنځیو مسؤلین، د څانګو آمرین، او یو شمېر استادانو ګډون درلود.
د کنفرانسونو د پیل پرمهال د شرعیاتو پوهنځي رئیس مولوي سراج الدین عمر منصور یادو استادانو ته د مبارکۍ تر څنګ د دوی علمي کنفرانسونه خورا ارزښتناک وبلل او زیاته یې کړه، چې د هرې علمي او اساسي ستونزې حل یوازې د علمي څېړنو له لارې ممکن دی. نوموړي وویل چې د استادانو دا علمي څېړنې نه یوازې د پوهنتون، بلکې د ټول هیواد د ځوان نسل د مسلکي، دیني، او علمي روزنې لپاره مهم ارزښت لري.
همداراز، ښاغلي عمر منصور ټینګار وکړ چې زموږ هیواد د علمي پرمختګ لپاره مسلکي او هر اړخیزو څېړنو ته ډېره اړتیا لري، تر څو شته ستونزو ته سالمې حللارې وموندل شي او د نړۍ له پرمختللو علمي بنسټونو سره سیالي وشي.
ورپسې استادانو، هر یوه، خپل علمي-څېړنیز کنفرانسونه د ټاکل شویو لارښوونو مطابق وړاندې کړل، چې د اړوندو مسؤلینو له لوري وارزول شول او مثبتې ارزونې یې ترلاسه کړې.
د علمي کنفرانسونو په پای کې د پوهنتون د لارښوود هیئت پر استادانو ټینګار وکړ، چې د دوی علمي څېړنو معلومات باید د له ارزښتناکو سرچینو څخه راټول شوي او پایله یې باید له مثبتو پیغامونو او لاسته راوړنو ډکه وي.
د یادونې وړ ده چې نوموړو څلورو تنو استادانو له پوهنملي رتبې څخه پوهندوی ته ارتقا وکړه.
د نشراتو او عامه اړیکو عمومي مدیریت
