غزني پوهنتون کې د کرنې پوهنځي د علمي چارو د ودې او لا پرمختګ په موخه نوی رئیس معرفي او رسماً یې خپلې چارې پیل کړې.

تېره ورځ غزني پوهنتون کې د کرنې پوهنځي د علمي او اداري چارو د لا پیاوړتیا او پرمختګ په موخه، نوی رئیس پوهنمل ثابت احمد باوري د رسمي مراسمو په ترڅ کې معرفي؛ او رسماً یې خپله دنده پیل کړه.
د ښاغلي باوري د پيژندنې غونډه د علمي چارو د مرستیال مولوي محمد حیدر حمزه، د مالي او اداري چارو مرستیال الحاج شیخ عبدالهادي ذوالهادي د استادانو چارو آمر پوهنمل نقیب الله حقاني او د تضمین کیفیت آمر پوهندوی دوکتور دریاخان هڅاند او د یاد پوهنځي استادانو په حضور کې ترسره شوه.
 په ورته مهال ښاغلي حمزه د نوي رئیس ټاکنه د کرنې پوهنځي د علمي، څېړنیزو او مسلکي فعالیتونو د ودې په لور یو مهم ګام وباله او دارنګه یې د پخواني رئیس له هڅو او لاسته راوړنو مننه وکړه او نوي رئیس ته یې د دندې مبارکي وویله، او هیله یې څرګنده کړه چې نوموړی به د کرنې پوهنځي د ظرفیت لوړولو، د عملي زده‌کړو پراختیا، د څېړنو پیاوړتیا او د محصلینو د علمي کچې د لوړولو په برخه کې اغېزمنې هڅې ترسره کړي.
همداراز نوي رئیس ښاغلي باوري هم په خپله وینا کې د غزني پوهنتون له مسؤلینو څخه د باور او مسئولیت مننه وکړه او ژمنه یې وکړه چې د استادانو او کارکوونکو په ګډ کار سره به د کرنې پوهنځي د چارو د ښه تنظیم، علمي پرمختګ، د عصري کرنیزو میتودونو ترویج او د هېواد د کرنیز سکتور د اړتیاوو پوره کولو لپاره به نه ستړې کېدونکې هلې ځلې وکړي.
د یادونې وړ ده چې د کرنې پوهنځی د غزني پوهنتون له مهمو پوهنځیو څخه دی، چې د مسلکي کادرونو د روزنې ترڅنګ د کرنې په برخه کې د څېړنو او عملي پروګرامونو له لارې د ټولنې د اړتیاوو په پوره کولو کې مهم رول لوبوي.

د نشراتو او عامه اړیکو عمومي مدیریت
 یکشنبه ، ۳۰ جمادی الثاني ۱۴۴۷ هـ.ق— ۳۰ قوس۱۴۰۴ه ش