د غزني پوهنتون عمومي رئیس له اداري کارکوونکو سره د اداري چارو د لا منظمتیا او ستونزو ته د ژر رسیده ګي په موخه مشورتي او معلوماتي ناسته ترسره کړه.
نېټې او ورځ :دوشنبه
٢٨ جمادیالثاني ۱۴۴۶ هـ ق
١٠ جدی ۱۴۰۳ هـ ش
٣٠ ډسمبر ۲۰۲۴
د غزني پوهنتون عمومي رئیس، الحاج مولوي عبدالواسع منصور، په مشرۍ د پوهنتون له اداري کارکوونکو سره د اداري چارو د لا ښه والي او ستونزو د ژر رسیده ګي په موخه مشورتي او معلوماتي ناسته ترسره کړه. په دې ناسته کې د پوهنتون د اداري چارو مرستیال مولوي محمد جاوید خالد، آمرین، مدیران او ټولو اداري کارکوونکو ګډون کړی و.
ناسته د قران کریم د مبارکو آیتونو په تلاوت سره پرانیستل شوه، چې د اسلامي ارزښتونو پر بنسټ د غونډې د معنوي فضا د رامنځته کېدو لامل شوه.
د غونډې په ترڅ کې، د پوهنتون عمومي رئیس، ښاغلي منصور، پر دې ټینګار وکړ، چې وظیفه یو الهي مسؤلیت دی او ټول کارمندان باید خپلې دندې په اخلاص، ژمنتیا او د قانون د اصولو په رڼا کې ترسره کړي.
هغه زیاته کړه،چې د ادارې ښه فعالیت د پوهنتون پرمختګ لپاره حیاتي ارزښت لري او ټولو ته یې سپارښتنه وکړه چې خپلې چارې په منظمه او اغېزمنه توګه ترسره کړي ترڅو اداري بهیر لا منظم او غښتلی شي.
په غونډه کې د اداري کارکوونکو ستونزې او نظریات واورېدل شول. د پوهنتون رئیس ژمنه وکړه چې د کارمندانو ستونزو ته به جدي پاملرنه وشي او د حل لپاره به اړین اقدامات ترسره شي.
د غونډې په وروستیو کې په یو شمېر نورو اړوندو او متفرقه موضوعاتو بحث وشو، ترڅو د ادارې کړنې لا اغېزمنې شي او د کارمندانو ستونزې په منظمه توګه حل شي.
ناسته د دعا په ویلو سره پای ته ورسېده، چې د پوهنتون د پرمختګ، د کارمندانو د بریا او د هېواد د علمي پرمختګ لپاره غوښتنه وشوه.
د نشراتو او عامه اړیکو عمومي مدیریت
