د غزني ولایت مقام د ارزونې او څارنې کمېټې د شپږ کسیز هیئت له لوري د غزني پوهنتون د اداري چارو څخه نظارت او ارزونه ترسره شوه.
د غزني ولایت مقام د ارزونې او څارنې کمېټې شپږ کسیز هیئت چې مشري یې مولوي عبدالکبیر مستقیم کوله نن ورځ د غزني پوهنتون له اداري چارو څخه نظارت او ارزونه ترسره کړه.
یاد هیئت د ولایت مقام د رهبرۍ د لارښوونې پر اساس ګومارل شوی و، څو د غزني پوهنتون د اداري او مالي چارو، د کارکوونکو د دندو د تطبیق، د اسنادو د شفافیت، او د اداري نظم د مراعت وضعیت له نږدې وڅېړي.
د ارزونې پر مهال، هیئت د عمومي ریاست په شمول د معاونیتونو او د پوهنځیو له ریاستونو څخه کتنې ترسره کړې، اړوند اسناد یې وڅېړل او د اداري چارو د ښه والي، شفافیت او خدمت رسونې د پیاوړتیا په موخه یې لازمې سپارښتنې وکړې.
په ورته مهال راغلي هیئت وویل: د دغې ارزونې موخه د اصلاحاتو راوستل، د شفافیت تأمین، او د ادارې د لا مؤثر فعالیت ډاډمنول دي، څو د پوهنتون اداري خدمات د کیفیت له پلوه لا ښه شي.
د غزني پوهنتون مسؤلینو د ولایت مقام لخوا د ترسره شوې ارزونې هرکلی وکړ او دا یې د ادارې د پرمختګ، حسابورکونې او شفافیت په لور یو ګټور ګام وباله.
د یادونې وړ ده چې د غزني ولایت مقام د ارزونې او څارنې پروګرامونه په منظم ډول د ولایت په ټولو دولتي ادارو کې دوام لري، څو د قانون حاکمیت، د خدمتونو د کیفیت لوړوالی او د اداري فساد مخنیوی یقیني شي.
د نشراتو او عامه اړیکو عمومي مدیریت
نېټه: یکشنبه
۱۴۴۷هـ.ق، د شعبان ۲۰ مه
۱۴۰۴هـ.ش، د دلوې ۱۹ مه
۲۰۲۶م، د فبروري ۸ مه
